Agsimaha Waaxda Arrimaha Bulshada ee Madaxtooyada Galmudug oo Ka Qayb Galay Shir Looga Hadlayay Isku Xirka Bulshada iyo Dowladda
Agaasimaha Waaxda Arrimaha Bulshada ee Madaxtooyada Galmudug, Mudane Abdikarim Alcadala, ayaa maanta ka qayb galay shir muhiim ah oo diiradda lagu saarayay xoojinta xiriirka ka dhexeeya bulshada rayidka ah iyo hay’adaha dowladda.
Shirkan oo lagu qabtay magaalada Dhuusamareeb ayaa waxaa isugu yimid masuuliyiin ka kala socday wasaaradaha heer dawlad-goboleed, hay’adaha bulshada rayidka ah, iyo wakiillo ka socday ururrada caalamiga ah ee ka shaqeeya arrimaha horumarinta iyo dowlad-dhiska.
Mudane Abdikarim Alcadala ayaa khudbadiisa ku xusay muhiimadda ay leedahay in la dhiso kalsooni iyo wada-shaqayn dhab ah oo u dhaxaysa dowladda iyo shacabka, si loo helo adeegyo cadaalad ah oo la jaanqaadaya baahiyaha bulshada. Wuxuu carabka ku dhuftay doorka ay Waaxda Arrimaha Bulshadu ku leedahay dhexdhexaadinta iyo fududaynta wadahadallada u dhexeeya labada dhinac.
“Xiriirka wanaagsan ee ka dhexeeya dowladda iyo bulshada waa tiirka ay ku taagan tahay dowladnimada. Waxaan rabnaa inaan helno bulsho codkeeda la maqlo, lagana qayb geliyo go’aan qaadashada,” ayuu yiri Agaasime Abdikarim Alcadala.
Shirka ayaa lagu lafa guray caqabadaha jira, fursadaha ka bannaan, iyo hababka lagu horumarin karo wada shaqaynta dowladda iyo bulshada, iyadoo la diyaariyay talooyin wax ku ool ah oo la doonayo in lagu daro siyaasadda guud ee maamulka Galmudug.
Dhamaadka shirka, waxaa la isla gartay in la sameeyo guddi farsamo oo ka shaqeeya sidii qorshayaashii kasoo baxay shirka loo hirgelin lahaa, loona dardargelin lahaa hawlaha la xiriira is-dhexgalka bulshada iyo dowladda
English 